Den gamle verkskyrkja på Lesjaverk vart teke ned og flytta til Lesjaskog i 1855. Sjå meir om dette under Lesjaskog kyrkje. Kyrkjegarden gjekk ut av bruk, og etter ei fredingstid på 20 år, vart også gjerdet teke ned og seld på auksjon.
I 1930-åra kom det så i gang samlingar og friluftsgudstenester på 17. mai på den gamle kyrkjestaden, og arbeidet med å få reist ei ny kyrkje på staden tok til. Sommaren 1940 vart det sett opp nytt gjerde, og kyrkjegarden vart på nytt vigsla og teke i bruk i 1941.
Etter eit par urealistiske utkast til nytt kyrkjebygg, vart det til slutt arkitektfirmaet Nissen og Brynning som fekk oppdraget. Sjølve byggearbeidet starta opp i 1962, med Åsmund Nyrnes frå Lom som byggmeister. I 1964 vart så den nye kyrkja vigsla og teke i bruk.